PLANTACIÓNS UNIFORMES SEN UTILIDADE SOCIAL

O monte sempre foi fonte de múltiples usos e produtos. O monte construía a nosa paisaxe e era unha referencia da nosa cultura. O monte constituía un lugar de lecer onde pasear e onde vivir, onde entrar en contacto coa natureza e de onde obter produtos como a madeira, as castañas, herbas, mel ou landras para o gando. Pero como ecosistema climácico ou próximo ao climax dunha sucesión ecolóxica, era tamén o noso sustrato ecolóxico básico; nel estaban todas as especies que tiñan permitido os asentamentos humanos e que podían garantir a súa pervivencia futura. No monte estaban os recursos de aprendizaxe que permitían que os nenos e nenas fosen a coñecer a paisaxe ecolóxica que soportaba, en boa medida a súa sociedade.

Diso pouco queda hoxe, a extensión dos monocultivos de eucalipto ten eliminado os servicios que o monte debe proporcionar á sociedade e os produtos que poderían ser utilizados coma unha fonte de recursos polos habitantes das comunidades rurais.

As plantacións de NORFOR, ademais, polas súas agresivas técnicas xestión forestal que implican o uso masivo de herbicidas, pesticidas e abonos químicos, a introdución de maquinaria pesada, as talas a matarrasa, os destrozos no solo, en camiños e en cursos de auga e os cambios drásticos e empobrecedores na paisaxe, convírtense no paradigma da ma xestión forestal e da destrución da paisaxe cultural, ecolóxico e social onde se implantan.

A utilización masiva de fitocidas para eliminar calquera posible conpetidor polos nutrintes do eucalipto convirte ao sotobosque nunha superficie desértica na que non so se acaba coa biodiversidade senón que significa a eliminación da producción fotosintética e xa que logo do primeiro nivel que poda soportar, producindo o alimento que precisan, outros niveis tróficos. Desaparece polo tanto calquera forma de biodiversidade animal e calquera posibilidade de uso do sotobosque para alimentación de gando ou para a alimentación de especies cinexéticas que permitiran a caza.

A Sociedade de cazadores de Rois presentou en Outubro de 2005 unha denuncia contra NORFOR "por empregar pesticidas de dudosa legalidade para as súas plantacións de eucaliptos nos montes de Reiboo e Vilar do Abade"